火炬傳送預習

每次煲呔會見領導人，都必然恭恭敬敬，拿出小拍子簿做筆記，十足十打工仔見大老闆既情況。波蘿游實在唔明，煲呔已經督定做到2012，雖然唔係富豪，但都唔駛擔心兩餐，應該領導人驚佢劈砲，多過佢驚被領導炒魷，咁仲駛唔駛每次都咁卑微，話晒都係國際大城市既市長，小弟實在唔明，唔通中國人真係有奴性基因。

上次煲呔面聖，亞爺特別強調特區政府要幫手攪好奧運，睇黎俾左煲呔唔少壓力，再下壓到政府官員，令官員騰雞，好多事都攪到不知所謂。就好似前文提過既火炬手名單，就為分餅仔，攪到要有百二人參加，大部份係政客及商家，根本就係將政治同奧運捆縛，有違亞爺既立場。

為要安排咁多人都可以參加火炬傳送，令到行程非常緊密，政府為測試運送路線時間及流程，要係明日實地實時進行預習，到時會有大規模封路，估計對交通及市民會做成極大不便。波蘿游覺得特區官員，可能已經有少少思覺失調，驚死攪唔好奧運，會俾老細詐型，好多野都但求有做，而唔理實際效果。好似今次預習，我認為實在白痴建議，究竟官員有冇用腦諗過，呢個預習是否可以反映多少現實，又犧牲多少市民利益。

呢個預習會實地實時進行，政府認為可以反映5月2日正式舉行時既實際情況，包括所需時間，以作評估流程及部署。但我認為今次預習根本與現實不符，夾硬去做，只會擾民，原因如下：

1． 跑手 - 預習全程會徵用一般跑手，但現實就有三份之二係政客及商家，有不少大肚腩及老人家。請問有邊個知曾憲梓及范徐麗泰手持火炬的跑步速度，要完成二百米要幾多時間，我相信佢地自己都唔知（其實好多非田徑運動員都唔知）。另外，途中會否有要爭出風頭的跑手，故意慢跑或停低，讓傳媒拍照。咁多變數之下，個預習時間有乜野代表性？

2． 途人 - 預習唔會有多少觀眾。但正式舉行當日，沿途會有大量受僱及自願啦啦隊、藝人跑手D受僱及自願fans、駐足的市民觀眾、爭搶好位的傳媒，佢地對跑手都會有或多或少的阻礙，預習係完全冇反映到。

3． 抗議或突發事情 –正式舉行當日，除了會有抗議人士可能從中騷擾及拖慢進程之外，還可能有其他突發事情，都會對流程做成重大影響。

我認為有鑒於以上變數，預習變得毫無意義，但就勞民傷財。今次根本就唔駛預習，只要用保守的跑步及交接時間作為安排基礎。例如，如果有六小時的流程，就用最保守計算基礎，以四小時完成為目標，並安排最後半小時途經最多途人的地方，如果當時進度理想，不妨在末段稍為減慢，並以嘉年華會式進行，務求與民同樂，咁就唔駛攪到大家都疲於奔命。但我估計政府可能要分好餅仔，例如政客及商家都要求有足夠show time，咁就只能怨政府冇做到強政勵治，攪到自己甩轆，就唔怪得人。

另一話題： 梁振英除左日前提早抽水，承認有份傳火炬外，昨日又高調批評政府「工資保障運動」唔成功，贊成政府就最低工資立法，目的當然係為左討好基層市民，抽政府水，增加自己民望，為參選特首鋪路。

首先，運動成功與否，政府還在檢討當中，梁振英的一番話，明顯與政府口徑相反，波蘿游有兩大疑問：

a） 行政會議有否討論呢個問題，是否已有打算立法，如果有的話，是否等於梁某違反行政會議的「集體保密協議」，事先張揚政府決定

b）如果行政會議冇討論過呢個問題，但梁某昨天言論，明顯是衝著政府而來，與政府立場違背，梁某是否違反行政會議的「集體負責制」，即成員對外意見必須與政府一致。

請特首明察，請市民明鑒。