轉台

手機或固網電話帶號碼過台，相信係十分普通的事情。今日閒逛電訊管理局網頁，發現原來每月都有統計「帶號碼過台」的成功率。以手機為例，成功率約為95-96%，但固網過台的成功率就只有約60-70%。自己最近搬屋，就差D甩拖，真係此料不及。

本地固網服務商主要包括老電、魔童、和仔、新記及九記。今次我搬去新記地頭，因為合約及歷史原因，本來想繼續租用和仔既固網及寬頻服務，但萬料不到查詢之下，和仔竟然話有寬頻但冇固網。我聞言十分驚訝，即刻單打和仔服務員，係人都知寬頻難過普通固網電話，有寬頻冇固網，豈不是識走唔識行，加上個屋苑有上千個單位，點解會冇固網。後來我坐低諗諗，大致都估到原因何在，純為商業考慮，非關技術問題。

和仔最初仲話我有固網合約在身，暗示要我補足費用先好走，個服務員即刻俾我省左一餐，今時今日咁既服務態度，加上係和仔既file，肥佬黎一定好有興趣報導，個位老哥先識時務收聲。

和仔冇固網服務，加上新記冇乜口碑〈今時今日究竟有冇人用新記服務？〉，唯有用8號仔既老電，老電雖然確認有固網服務，但就補充係新記地頭〈即係好多陀地勾腳〉，要個幾星期先攪掂。我最初以為三兩日就可以轉台〈以前老電轉老電三日必攪掂〉，結果遲左申請，有成個星期冇固網用。而和仔裝寬頻亦有同樣問題，要成兩星期先辦妥，亦有成個星期無得上網。

固網轉台，尚有另一波折。因為未能繼續提供固網服務，和仔叫我填寫服務終止表格，然後先可以轉台到老電，我唯有照辦。但過左幾日，老電call我，話和仔唔肯移交我個號碼過台，原因係我已經終止服務，個舊號碼變成和仔資產。真係咁都得，乜野世界呀。解決方法，原來就係要去信和仔，取消之前既服務終止，double negative，擾攘一輪，先至平息，可以帶號碼過台。但最初幾日既固網就被迫先用新號碼，等一個星期，個舊號碼先番到黎。

電訊商及地產商千絲萬縷，互相玩野勾腳，保障自己利益，最後苦了顧客。所以固網過台的成功率就只有約60-70%，自己未有成為果30-40%的失敗者，已經算幾好彩。如果要搬屋固網及寬頻轉台，都係要早作準備。

一校兩制

政府近日推出母語教學微調方案，讓部份達標的現有中中學校，可以開立「彈性班」，容許校內部份達標學生以英語上課。同一學校，應該說是同一級別，有兩種授課語言，亦即有兩種制度，變成一校兩制的試驗場。據官方所言，一國兩制已經“成功落實”十年。但今次的一校兩制，成效則恐怕是吉凶未卜。

英語授課班只限於英文達標的學生，校長要推行「彈性班」，必須將此等「精英」集中於同一班內。假設每級有四班學生，恐怕要將所有精英集合於其中一班，以達教育局要求作英語授課，而其他三班則維持中文授課。

在實行方面，學校的資源必須大幅增加。以初中非語文學科為例，老師們必須要準備中文及英文教材各一，定必大大增加老師整體工作量。根據教育局要求，老師亦要英文達標才能以英語教學，對英語能力較差，尚未達標的老師，會變相成為學校發展的絆腳石。負責數理的老師普遍英文根基稍遜，要他們進修英文以求達標，多少強人所難。平情而論，只要關心學生，具有教學技巧，就算以中文授課，亦可以教出好學生。

因為要大量增加資源，就算學校能符合彈性班的要求，亦不易局部轉型。但對於功利為先，只看門面的家長，又只會以英文班多少來鑒定學校優劣。難免有學校就算教師資源不足，亦強行開辦彈性班，結果老師要雙語備課及講學，在同一資源下，恐怕是畫虎不成反類犬。

如果教學資源要兼顧中英班，學校要擦亮招牌，勢必將資源放在精英雲集的彈性班，他們就好像王府的貝勒及格格等，得到最好的教養及關顧。而其他英語水平一般的學生，會因此而受到冷落，變成彈性學校裏面的犧牲品。

因為各級只有部份學生享有英語授課，難免有標籤效應。良性的標籤效應，本來會速成良性競爭，推動同學力爭上游。問題是如果校內的彈性班有上落車制度，是否有學生會因為成績升降，變成今年是英語授課，來年就變成中文，而反之亦言，叫這些邊緣的上佳學生如何適應。如果沒有上落車制度，是否中一成績定生死，往後六年如何努力亦不能改變命運，在校內造成嚴重不公的現像。

彈性班知易行難，加上該些學校學生只是中游分子，師資恐怕亦是一般水平，學校明知力有不逮，亦為了討好家長而逆水行舟，結果難以想像。比起理念正確的母語教學，微調方案恐怕才是中等水平中學的十年浩劫。

衣不如新，機不如舊

近月公私兩忙，加上金融海嘯的抑壓效應，久久未有mood寫blog。

因為搬屋關係，要同已經共處十載的29吋顯像管電視機道別，為響應「消費抗海嘯」的亞Q理論，重鎚添置左部52吋LCD電視機，算係十年唔發市，發市當十年。買機時我問Sales部29吋老爺機有冇人收購，當Sales知道係顯像管D低等貨色，即時面色一變，只笑謂老人院都唔收，但答應捱義氣免費搬去堆填區。其後我幾經轉折，終於搭上搭，搵到真正用家（好似拎上山D村屋用），並免費搬走減輕堆填區負擔。

要揀52吋IDTV 選擇好少，我買左部三星LCD，貪佢D款式好似最in，並號稱超薄型。我亦另購藍光碟機配合，仲大手買入成千大洋的藍光碟。對於我地D要求唔高既用家（否則點可以與老爺機共處十載），對效果自然相當滿意。一下子upgrade左咁多，亦乘機邀請親友共賞，show show quali。

唉，但好景不常，部LCD用左唔夠一個月就跪低，冇聲冇影，任何信號都係有入冇出。Call三星師傅上門，唔駛五分鐘已經投降，唔識整，要等公司安排換機。而家買電視機好似買PC咁，乜鬼都CPU控制，部manual有install CD奉上，咁鬼麻煩，一D都唔以人為本。今次我估係D control board壞鬼左，所以手動或remote都冇反應。而家D廠家為左要以最新型號應市，D機既硬件冇做好可靠性測試，軟件又冇de-bug好，話咁快就唔work。

相對於以前部CRT用左十年都冇壞過，今次部LCD未滿月已經跪低，唔通真係：衣不如新，機不如舊。抑或係我遇人不淑，上錯左船，好似雷曼苦主咁，唔係自己揀錯，係俾廣告誤導。

我都係以亞Q的科學精神分析，因為未有充份數據〈師傅都話未整過咁新model〉，暫時只能列作個別事件處理，即係未有證據顯示產品有系統性或結構性問題？