千億真偽有誰知

千億爭產案，雙方的筆跡專家終於登場，肥通手持的遺囑，被對方專家提出九處 問題所在，指稱好有可能是偽造。

波蘿游唔係專家，唔識鑑證筆跡。但既然專家係對頭人，梗係話對方係偽造啦。就算係我即時簽兩個名，都一定有N個不同。立場既定，再加上顯微鏡幫助，要找出N個不同，真係比小學生的「看圖找不同」更加容易。

我雖然唔識鑑證，但從博奕論（game theory）分析，我好相信遺囑上面的三個簽名同埋印章，都係真既。首先肥通已經有成廿億身家，絕對是富豪級數，可以嘆足兩世無憂。千億雖然吸引，但如果要造假簽名，一旦事敗，就要放棄鮑參翅肚，改食皇家飯，代價實在太大，我認為搏唔過。而且要冒簽三個唔同簽名，加上有D簽名相當複雜，好難偽冒，難度實在太高。

而且兩個簽名證人仲在生，要校對簽名，一定會找當事人對質。除非已經收買兩人，否則對方一定當場踢爆。但觀乎兩人在庭上表現，都冇偏幫肥通，而且仲有多少敵意。肥通要冒佢兩個簽名，多多都唔夠死。以此分析，要冒簽的機會更低。

而最頂癮既就係個倒轉既印章。法律上來講，根本就唔駛要印章，遺囑一樣有效。要冒簽就唔會加個印章，多個印章變成多個香爐多隻鬼，製造更多破綻。而且如果係冒簽文件，蓋印章一定小心，斷唔會倒轉左。相信是該律師過於忙，忙中有錯，將個蓋印倒轉左。以肥通的財力物力，一定會搵到（或者買到）該律師於同期蓋印的其他文件，兩個蓋印在顯微鏡下比對，如果有相同位置的磨損，就更加確認遺囑簽名真偽。

但係，就算簽名珍珠冇咁真，是否富婆的真正意願，將自己及愛人的畢生努力奉上。俗語有云，冤豬頭碰著個蒙鼻菩薩，富婆喜歡的話，以佢獨斷獨行的個性，就算臨尾給大家一個surprise，show大家hand，天要下雨，娘要嫁人，吹皺一池春水，干卿底事（其實千億慈善基金,，都算係涉及重大公眾利益）。

但咁樣做法，對咁迷信既富婆來講，會諗到泉下同老公相會，點樣可以同老公交待。還係張野真係風水遺囑，富婆諗住會化為灰燼，但後來又病到唔記得左件事。當前情況，可以話係：

周公恐懼流言日 王莽謙恭下士時
既然富婆身先死 千億真偽有誰知