新銀紙

年近歲晚，又係時候換新銀紙，用黎過年派利是。雖然好多人認為新銀紙唔環保，但我就有D唔太同意，環保要考慮方便程度，亦要顧及效益。因為新銀紙唔係用一次，而係幾十至幾百次，直到殘舊為止。如果銀行新年發左新銀紙，該年餘下時間就可以減少印製。反之，利是封就係一次過，而且面積又比銀紙大，利是封更不環保，但就好少有人建議少用或再用。

反而諗起細個時候，因為冇銀行派新銀紙，及為左慳番D利是封，部份長輩親友派利是，都會一封過給我們全家，然後我地七個人自己分。記得裏面個銀碼都跟住香港經濟起飛，由最初的五十元，增加到後來的五百元。跟住就風水輪流轉，長輩都先後退休及老去，而家就輪到我地回餽，過年俾番飲茶利是。就算計埋通脹，長輩們都有理想回報。而當時一封利是全家分的做法，就係因為物資短缺下的環保表現。

要換新銀紙，一般都要去銀行排長龍，但我有幸銀行客戶經理識做，每年都會有新銀紙到會服務。今年為家人得悉，一傳開去，加上太太和我都來自大家庭，兄弟姐妹多籮籮，令需求急劇增加。去年還是四位數字的總額，今年差D去到六位數字，攪到我為左唔想load晒落一間銀行，要call埋另一間分擔一下。

一舊舊新銀紙，D氣味都相當難聞，唔知咁樣算唔算嫌錢腥。我都要先後分兩拿番屋企，雖然比起D每日袋住幾百萬過關同志來講，我D簡直係零頭而已，但我自己回家途中都有D驚，要東張西望，怕俾人老粒。

番到屋企，仲要按各人需要，細分及獨立包裝，等團年飯時分發。

咁多舊，為左掩人耳目，究竟用最cheap既紅白藍袋好，還是兩個百佳袋好呢?