迷你債券 – 誰是誰非

今次雷曼迷你債券「慘劇」，真係禍延甚廣，攪到唔少人臨老過唔到世。我睇左幾份主要報章，都冇清楚報道認購文件內容，攪到好多評論員都係靠估，黎分析D運作模式。我見好多學者被訪問時，都係一知半解，唔知D野點work，但又要扮pro，真係十分難為情。照計當日散戶認購時，應該有本電話簿咁厚既認購書，今日冇softcopy在手，都可以借本電話簿俾傳媒研究，等大家唔駛靠估。

反而新加坡網友 lion investor，就有提供新加坡版既雷曼迷你債券認購書，波蘿游本著求知精神，即時借黎研究一下。星洲版迷券同樣參照幾間星洲及國際公司信貸，其中包括匯豐及渣打，我估計玩法同港版大同小異。但星洲版並冇擔保人，反而根據報紙講，港版就有雷曼做擔保人。

我快讀星洲認購書，裏面清楚指出風險如下：

1． 參考公司〈即匯豐、渣打等〉信貸情況改變（例如面臨危機，以致評級下降，或有違約事件），可以引致部份及全部損失
2． 抵押票據的潛在証券（CDO是也），有價格下跌風險，可以引致部份及全部損失
3． 擔保人未能執行職責（只適用於港版）

星洲迷券書強調CDO最少是AA評級，但最頂癮係本書冇講係邊種CDO，並聲明只要評級夠秤，無需披露CDO係乜東東。

結果係：顯然匯豐、渣打冇事，但CDO個價就可以大跌（因為認購書冇講係乜CDO，冇人知跌幾多），加上擔保人雷曼自己摺左，變成無法買賣。我相信迷券最後淨番幾多，主要睇CDO剩番幾多，一時間真係冇乜邊個答到。

我估計金管局批准迷券零售，主要參考有AA評級資產抵押。一年之前，D所謂AA評級資產，應該穩陣過渣打及和黃等大藍籌債券，金管局點會諗過踏中百年一遇塊蕉皮，D零售銀行可能一樣烏SirSir，信晒AA級，除非散戶英明神武（係既通常唔會買債券），識得熟讀風險分析，否則難以倖免。

千錯萬錯，都係評級機構最錯！