地產一二事

眼見自己個臨海豪宅盤去貨甚慢，發展商大老板王總急召張經理，商討應付方法。

「亞張，DLS，你攪乜鬼，而家個市咁好，點解我地個盤去貨咁慢？」

「老細，我已經日捽夜捽D代理亞頭，叫佢地D伙記拚命，我地個盤郁下都幾千萬，D客梗係要諗耐D，去貨自然慢D？」張經理口窒窒回應。

「我唔理呀，你同我死掂佢，放長D交吉期，搵D炒家幫手搭棚，記得叫D supplier一人包一件，仲有班大陸友，我之前俾咁多生意佢地，而家要佢地幫手，5%首期，成年半成交期，個市一升就轉手，唔駛上身。再唔係記得搵地產李幫手，佢地隔離都賣緊另外個盤，大家jig 高個價，互買幾件高價野，總之要創新高，呢D唔駛我教呀？」

「老細，知道，知道，已經做緊，我約晒D 地板，冷氣，電器，雲石supplier，如果邊個晤幫手，個盤第二朝唔駛旨意做我地生意。」

。。。。

以本港地產商之實力，要mark 高幾件億元單位造勢，根本就易如反掌。豪宅炒家亦唔係lu lu，一於睬佢都傻，靜觀其變，兩手準備。即使有五萬、七萬蚊一呎之新盤「成交」，現貨豪宅價還是不動如山，仍未全面突破去年高位。

中下價樓盤步伐更慢，只算是矮仔上樓梯。德福花園五千七呎價是新高嗎？只與去年高位相若，同一單位，比起九七價仍低了二十幾%。

醫生加律師，斷估月薪都有八萬，一般可以供得起六百到八百萬樓，咁都話買唔起樓，真係叫人O咀。枉費我多年交稅，供書教學資助佢地讀大學。反而煲呔叻番次，對樓市產業都有D識見，知道真正高低。