中產惜福

寫左幾篇醫療融資，依然未入正題，去評論諮詢文件利弊，但就已經覺得有D悶。其實融資既野，一定係財富再分配，即係有能力既就俾多D，幫下D有需要人士，但點樣界定邊個係有能力，邊個要俾多D，及要俾多幾多，永遠係沒完沒了的爭論。

低下階層當然希望福利有增冇減，中產又會大喊錢就出左，但福利就冇我。咁究竟點先算係合理分配，邊個先係受益人，邊個先算係受損既中產，今日我就講下呢個話題，而波蘿游作為小商人，一切考慮都會由錢出發，計下港人一生的得失，就要將佢一生拎過既福利，再減去佢可以交既稅，就得出結果。

如果以「現價」粗略計算，一般港人成長期領取既福利包括：
a） 九年免費教育津貼，約三十萬元
b）如果有住公屋，二十年津貼，約二十萬元
c） 本地大專或大學津貼，約三十萬元
d）其他：公立醫院、治安及消防、馬路、文娛、掃街、等等，就暫時唔計住

一生下來，原來直接福利都有八十萬。如果要靠三十幾年工作交稅去還，每年都要交兩萬幾蚊稅，即相當於每個月有三萬蚊收入。但記住呢個三萬蚊係一世人的平均數，現時大學畢業生一般係三十歲前，都係平均月入萬幾，要六十歲時還清的話，在黃金30+歲的人工就要升到三萬幾了，而在40-60歲時就升到四五萬了。

以06年的在職港人月入統計，擁有學位人士的月入中位數是$19,500，即月入三萬以上的學位持有人恐怕未到四分之一。考慮以上數字，莫講話基層還唔清俾政府（更何況收入中位數以下的幾乎不用交稅），就算是大學畢業的中產，最終能以一生努力，而無負於社會的，可能唔到四分之一。

有人或會認為本港樓價高企，是政府高地價政策，因此中產置業，其地價成份，應看成是一種稅項。在下不同意這個觀點，要有地方安身，你可以選擇租樓而非買樓，因此買樓只算一種投資，冇人強迫閣下去做，你可以改為買股票，相信冇人會將買股票看作交稅。你或許認為樓價高企，令租金都高企，但實情是租金高低，係你為左享受方便或環境的選擇，好似你覺得太古城租金太貴，可以選擇東區的唐樓，交通方便無異，但租金就平了一半有多。

中產的定義向來十分模糊，而自稱中產的，又往往抱怨付出多過收獲。根據小弟以上計算，如果你一生平均月入三萬以下（如果將配偶都計埋，就變成五六萬的家庭收入），政府俾你的好處，多過你付出的。因此，就算政府要閣下多交一點稅，又或者甚麼融資稍稍減少左你的淨利益，也不要太計較吧。

如果你月入超過三萬，又或家庭月入超過五萬，那我恭喜你，我認為你先配叫做中產，並感謝你對社會的淨付出。我明白你有今日既成就，主要靠年青時努力讀書及工作，比朋輩付出更多的成果。但你又有否想過閣下高於常人的IQ及EQ，及個份努力不懈的意志力，都是上天賜予的恩物，如果你冇擁有呢D天賦優點，你又點可能有今日既成就。我想你在惜福及感恩之餘，亦可否多點貢獻社會，就好像蜘蛛俠的格言一樣：With great power comes great responsibility，多交一點稅，多融一點資，飲少兩餐茶，對你而言，少意思吧。