醫療融資系列 （四）公營私營醫療對對碰

日前經濟日報引述保險公司調查，香港私營醫療費用之高，全球排行第二，僅次於因為醫療訴訟普遍而費用極高的美國。我先前粗略估算，都證實香港私家醫療費用高昂。今日細看政府醫療融資文件，一再證實我的看法，根據文件提及的04-05年數字：

1． 政府公營住院支出： 212億
2． 私營住院收費：57億
3． 公營及私營病床數目比例： 10：1

單看上面數字，就得出每張私營病床收費是公營2.7倍，如果再考慮04-05年時私家醫院仍未大旺，入住率應該只得60-70%，低於政府的數字（90%以上），一來一回，就計到私營實際收費是公營支出的三倍以上。

見到D咁既數字，波蘿游即時要向醫管局員工致敬，肯定一下佢地努力工作的成果，其中亦包括顧問醫生及高層。波蘿游感慨九七之後，好多港人都患上“憎人富貴嫌人貧”惡習。雖然醫管局過去十年，面對工作增加（人口及老人數目上升），但整體支出反而因效率提升而稍微下降，但卻經常遭人埋怨效率低，管理層人工高（實情係佢地人工低過私家做既同學好多），實在是批評者對市場一無所知。

另外，對於各位私家醫院及醫生們，我亦要大叫一聲，你地效率好低，更貼切係，你地食水都好深啊。但近年私家醫院病床都接近飽和，令你地失去減價動機，因為就算醫生願意減價增加客量，都冇足夠病床配合，最後當然係吊起來賣，賺盡一分一毫。雖然好多私家醫院都正在加建，但如果考慮到私營床位只佔全港的10%，而人口老化會令未來全港床位需求增加70%以上，就覺得現在的加建都係細眉細眼，就算將來成功融資有錢，香港都沒有床位，可能要返去大陸醫。

既然私營效率不彰，又要顧及將來醫療需要，政府可能要使出以下奇招：

1． 速建五六間（？）等同瑪麗規模的醫院，主要提供私家收費服務。選取優秀醫護，將工作量減少30%，以做到無需輪候，與優質私家服務體齊，收費以成本再加上30%利潤（其中10%作為員工花紅），估計到時收費都只係私家現在的一半，極有競爭力，足以迫使私家降價。

2． 興建耆英港，分唔同級數收費，做埋私家條水，給予私營壓力

3． 快速大量撥地，給私家競投起醫院，令佢地達到規模經濟效益，同時加大競爭，令私家市價下調

4． 與國內有水平醫院結盟，將其規範及提升服務水平，以增加私營醫療的供應量

如果唔解決供應問題，有錢醫都會冇訂使。