一葉扁舟海嘯中

中信泰富一鋪勁蝕155億，除非你係老闆或者係老闆個女（仔），否則好彩就要執包袱，唔好彩就可能要食皇家飯。作為一個打工仔，莫講話蝕155億，就算係蝕15億都一定冇得留低。

既然係數佬出身，都應該知道乜野叫風險管理。玩亞Q輸身家例子，最近係上市公司之中，都有幾個例子，好似鴻興印刷就係年初出事，以亞Q合約做外匯對沖，最後將多年基業拱手相讓他人。作為上市公司財務總監，應該知道呢個慘劇，做沽對沖要知所進退。今次輸左公司市值一半，如果唔係有母公司打開口牌照住，加上有紅衣護身，公司恐怕要即時摺埋。

按照報紙資料，公司未來兩年要三十多億澳元資金，但根據亞Q條款就要接收逾90億澳元，好明顯就係對沖過籠。既然有鴻興先前的教訓，D數佬又點解會輸到咁慘。我唔想用陰謀論來估，因為董事局究竟做過D乜，應該要向證監會同小股東解釋。但如果輸到咁金，一定係個亞Q合約個價set到好盡。同ELI差唔多，亞Q都係類似沽出認沽期權，可以係贏粒糖、亦可以輸間廠。

我相信數佬應該自己計過風險，然後先去簽份約。可能有人要爭取表現，又或者老闆要交功課，唔單止要做對沖，重要幫公司賺錢。如果澳元市況上升或保持淡靜，公司可以收取期權金，增加投資收益。加大力度做亞Q，就可以增加期權金收入，作為額外投資收益。但針冇兩頭利，被迫要接受銀行更棘既條款，除左加大注碼，重要承受逆市加倍接貨風險，最後就走上絕路。

大家可能會問，點解會輸到155億咁犀利，就算輸15億都好離譜。現實就係無論輸155億或者15億，打工仔都一定要執包袱。反正都係OPM，咁就有道德風險，如果賭到最大，就可以將“順景”下既利潤最大化，增加自己既花紅。反正如果逆市既話，兩者都係執包袱收場。作為打工仔既，可能都會好似特首話齋：賭鋪勁。問題係既然有鴻興事件，董事局究竟有冇人問過最簡單問題：“喂亞邊個，近牌澳元升左咁多，如果掉頭大跌，worst case 會係點？”。究竟有冇人有common sense，問個呢條問題，而又有冇人將答案美化，抑或有人覺得呢D係百年一遇，非常假設性，唔會咁好彩發生，然後抹殺個風險。

金融海嘯當前，百年老店要關門，上市藍籌勁蝕百幾億，散戶都變成一葉扁舟，祇求係海嘯下幸存。連國家債券基金都倒跌10%之時，波蘿游為求自保，唯有轉移陣地，以分散重投方式，落注幾間銀行做定期，希望以4%的年息保暖，渡過這個寒冬。