$250 可以做得乜？

施政報告，整左D長者醫療券出黎俾70歲以上老人，$250一年睇私家醫生，究竟班官員有冇做個調查，點樣諗野，$250可以做得乜，頂多睇一兩次普通科私家醫生，咁D老人會點用D錢？

1． 基層老人
一向冇睇開私家醫生，只靠廉價或免費政府醫生，每次仲要好多藥，。為$250，可以叫佢地試下睇一次私家醫生，感受下D貴氣，享受下唔駛一早排除既安排，一年一次咁多啦。但係佢地平常睇開政府，忽然轉私家，私家醫生之前都冇病歷紀錄，唔知乜頭乜路，單睇一次根本幫唔到病人，病人之後又冇錢覆診，跟住又去番睇政府，唔去睇私家好過去。唯一意義，就係叫老人每年享受一次私家會診既滋味。有便宜唔駛洗頸，老人當然會慳呢筆街外錢，一定會去睇下私家，$250最後用得不明不白，真係食落肚好得多。


2． 中產老人
佢地專科長期病症一向去開政府，例如高血壓、糖尿、風濕等，因為一早book定，定期覆診。政府專科較私家收費低得多，加上每次有幾個月藥，D中產老人還可以負擔。只有當忽然頭暈身熱既時候，因為有D積蓄又唔想去政府醫院排隊，先去睇普通科私家，可以話係自己既家庭醫生。但老人一年最少要睇幾次私家，醫療券幫到一次，只係聊勝於無。


3． 富貴老人
一向光顧私家醫生，包括高收費的私家專科，一年閒閒地可以用上幾千蚊睇醫生，$250真係濕濕碎，或者佢地都懶得去申請 。

綜合以上個案，只有少數的「中產老人」輕微受惠，可能佔唔到合資格老人的30%，其他70%錢就浪費左俾私家醫生，而老人冇真正受惠。加上醫療券好像會用甚麼電子記錄，行政成本一定甚高，真係唔知點解要咁樣實施。

如果政府心想幫下D老人，增加$250生果金實際及有用得多，令佢地可以針對自己需要，善用呢筆$250。

如果政府打算利用今次措施，為將來大型醫療券計劃作試驗，咁就好似用錯case study。如果有70%用家冇實際得益，佢地會冇動機「善用」醫療券，最後效果只會強差人意，令試驗失去代表性，唔可以作為日後參考。