$250 可以做得乜？ 有答案喇！

黃昏聽收音機，周局長曾對醫委會解釋，$250會分為五張醫療券，病人每次睇醫生只能用一張，即五十大元。

聽完呢段消息，我即時好似金田一上身咁，大叫：「所有謎題都已經解開了」。

以現時政府普通科門診每次$45，而私家普通科約$110 - $210，醫療券可作$50，即係話每次睇私家要自己多俾$60 - $160。咁我D分析要修正如下：

1． 基層老人
佢地一係睇開免費政府，一係就俾開$45睇政府。前者當然唔會願意自付$60，後者要多付$60 - $45=$15，可能都慳得就慳，寧願排政府醫生。最後兩者都唔會行使醫療券，即冇我前文擔心的濫用問題，政府最終不用兌現此批醫療券，慳番一筆。

2． 中產老人 及 富貴老人
佢地係醫療券制度既target customers。因為唔想排隊睇政府，願意自付$60 - $160。佢地會因應能力及喜好，選擇適合自己的私家醫生。經濟好的會願意自付$160或以上，找最貴〈最好〉的私家；手緊的會四處尋找最平私家，令自付的銀碼越少越好。如果政府醫生成本每次超過$100（因為俾好多藥），將病人轉移到私家，每次政府仲可以慳：（$100-$45）- $50=$5，此算法當然未計醫療券行政成本。

但今次醫療券最大目的，唔係為慳錢，而係分析病人D付款能力。因為私家醫生將來會用電腦上網，輸入病者年齡及 ID 資料，以電子形式過帳，令政府完全掌握老人用醫療券次數，及每次願意自付多少錢。呢D數據會用來量度老人睇私家醫生既供求價格彈性，即係病人既付款能力，會係一套十分全面的數據。數據會幫助政府將來把醫療券延伸到其他年齡，及按市民付款能力，調整醫療券銀碼，藉此將部份政府醫療工作，以最低成本轉嫁俾私家醫生分擔，做到公私合營，為市民提供更多選擇。

唔！初步睇黎，呢個係一個相當聰明既方法，抵讚！！

後加意見：

差點忘記了市場力量的威力： 醫療券推出後，肯定有屋私家醫生為了爭取年老病人，會提供「老人優惠」，例如將老人診金調低到$95，減去$50醫療券，病人實付$45，跟公營醫院收費一樣，當然不會再去公營醫院排隊。再者，屋醫生本身如有空閒時間，人工及租金固定，額外成本只是一些藥物支出，雖然只收$95，仍然除笨有精。

另外，如果綜援老人病到五顏六色，冇體力去排隊睇政府醫生，緊急時亦可自掏$45，再加上醫療券，去睇附近私家醫生。相比於以前無法負擔的百幾蚊，貧窮老人緊急時亦多個選擇。

最終是： 醫管局、私家醫生及病人三贏局面， Bravo ！