百佳的百般無奈

上週百佳超級市場全線停止主動派發膠袋，轉為鼓勵顧客自願捐兩毫，以索取可分解的環保膠袋。此計劃一出，即刻受到不少批評，有的說是綽頭招來，有的擔心公款私用。昨天百佳決定「多一事不如少一事」，以計劃「備受抨擊」為理由，終止有關籌款計劃，變相要幾多膠袋都免費，接下來又是一連串的批評。

老實講，你話今次計劃，百佳有冇綽頭成份，我想總有多少。但有否賺錢成份，肯定百佳諗都唔敢諗。試想，兩毫子，仲要係自願。每次收銀員都要苦口婆心，勸說顧客捐獻，過中收銀員有多難做，有多少要給顧客為難，其父母有否給人問候（恐怕大多數都有此遭遇）。區區兩粒神，要費咁多唇舌，減慢顧客流動，又多數唔肯俾，有些還責備收銀員，變相影響士氣及工作效率，如此計算，莫講話每個膠袋收兩毫，就算收兩蚊都補唔番。

我想百佳的洋人總經理，最初都真心想環保，並且可以支持一下政府要推行的膠袋稅，仲可以有環保宣傳綽頭。百佳肯定預料計劃多少會有上述阻滯，並會帶來輕微經濟損失，但可以建立環保形像，亦決意執行，但如今咁大社會反響，經濟及商譽損失，遠超洋人的價值觀可以預算的範圍。

對於偶一光顧百佳的顧客，兩毫子算甚麼。如果你幾乎天天光顧，為何又唔自備購物袋呢，反正習以為常，常備購物袋又有幾唔方便呢？只能哀嘆「部份」香港人（唔知有幾多），口講環保就容易，稍為身體力行都No Way。好似每日返工，總見到一些有公事包或背包的上班一族，買報紙時還是要用膠袋，在下實在無法理解。正因如此，百佳的洋人總經理可能也無法理解，兩粒神，有準備就可以慳番，駛唔駛喊打喊殺，好端端的一個計劃，最後無奈剎停，仲要俾環保團體鬧玩綽頭，做事虎頭蛇尾。

市民如此質素，更促使政府盡速施行膠袋稅。

哀嘆很多法律，都是為了制約無公德之徒而設，最後全民受害。