08樓市點睇 ?

上文講開樓市，網友又有回應，都係先講講點睇樓市，然後再寫D關於醫療融資既野。首先利益申報，正如我先前「07樓市雜談」一文提到，我於上年底兩次入市，已經上會，現仍持有，一個租出，一個空置，善價而沽，兩者帳面皆有微利，。

前文提到的利好因素，基本上仍然存在，包括利息低，人工上升，供款能力提升，租金上升速度加快，供平過租的樓盤周街都係。而且過往樓市急升動量，都有最少50%升幅，去年至今升了30%，即仍有超過20%動量。港股直通車尚待開通，對股市有支持，令樓市間接受惠。

但過去幾個月，亦出現了不少負面因素：

1。 成交量下降
二月成交登記下跌，預算三月登記會因農曆年假而下跌更多，顯示買賣雙方膠著。根據過去經驗，如非年假因素，而成交連續兩月下跌超過30%，乃急升後急回的訊號。

2． 美國經濟下滑
美國經濟弱過藥煲，拖累港股下滑，盛傳部份Accumulator損手大戶賣樓救股，令貴價單位氣氛變壞。原先我估計市場淡友會顧慮直通車，恒指可守二萬四以上，但去週已跌到二萬二。如此港股走勢，今年直通車可望開通，但最終威力如何，還看中央出手有幾重。

樓市後市點睇？我冇水晶球，只有見步行步，見招拆招，以「一年為限」，我估計有兩個可能：
a） 大致橫行（波幅少於10%）
b）鞏固後再急升（超過20%），然後很快又回順（可達急升的七成）

後市策略，我會分成兩類單位考慮。以六百萬元分界，好多貴價樓已經炒過龍（去年升超過40%），不宜真正買家。而中產樓則升了20-30%，升幅未算離譜。如果已經購入，可以繼續持有，相信以去年「有限」升幅及本港經濟因素，其價格難以大跌。如果有需要置業或換大樓，以現存因素，尚可按能力以保守按揭入市，但就要有心理準備，不要太著重短期波動。

自己畢竟年紀大，膽子小，作為投資者，會用上長短棍戰略，一個中長線收租，一個就坐近車門，等待落車訊號，隨時可以下車。


警告聲明：以上貼士山埃成份極高，服用前必須先考慮本身體質，及徵詢專業意見。