2009年8月10日 星期一

半桶水計劃

唔通政府真係俾人打窒,好似做乜都係慌失失,樣樣都係半桶水。教學語言微調如是,今次中學生驗毒計劃亦如是。

今次驗毒計劃真係不倫不類,家長可以否決唔簽,學生可以臨場say No。食得K仔,當然都係「懶」醒目一族,加上有部份輿論支持,如果俾揀中又身有屎,梗係即時say No。搵社工去了解?俾面既就拖拉一個禮拜,其間就暫停食K,然後再去驗就過關。唔俾面既,就睬你都傻,大大聲要保障人權,D社工又可以點?

國際學校實行強制驗毒年多,效果好似唔錯,番食既幾乎零。D鬼佬同鬼仔最講人權,點解晤見佢地去南華早報反對?亦好少見有傳媒批評國際學校方法既做法,唔通有雙重標準,覺得我地D本地生高貴D?唯一提出異議解釋,好似得黃仁龍一個,話香港九年免費教育,唔可以跟國際學校做法,將拒絕驗毒D學生踢出校。

黃仁龍鋪講法真係有D問題,首先冇人話要踢D食K學生出校。已經食緊K,再踢埋出校,同推佢地落火坑冇乜分別。但唔踢出校亦唔代表縱容食K,亦唔等於冇法子強制驗毒。除非已經過左強制教學年齡,否則返得學校就要受到若干約束。如果乜都人權大晒,點解返學要校服,點解學校唔俾染金毛,點解唔俾走堂(就算我D成績OK)。又好似SARS其間,點解可以強制學生先量體溫,然後先可以入學校。如果政府真係有決心去馬,又駛乜立法,就算立法,大多數議員都會同意。

我從電台聽過有D學生關注組織,表示對強制驗毒有保留,認為會破壞學校與學生之間的互信。聽過D學生講出觀點,俾我既感覺,應該係D叻仔叻女,說話好有條理,組織十分慎密,雖然係中六七學生,比好多做左幾年野D大學生還要好。呢班應該係精英,我好相信佢地唔會食K,但係佢地D想法太過自我,冇諗過有時要犧牲,個計劃先會成功,咁先會幫到D食K同學。

我認為要做就全港強制,開始前先行特赦,如果學生自首既話,一切保密,只會通知家長及相關老師,如果願意接受戒毒,而又在指定時限內成功既話,就唔再追究。先小人後君子,再進行校內驗毒,而且只向舉報目標出擊,令驗毒資源更有限發揮。一經驗出,學校會向同班同學講出姓名,然後要強制戒毒,並要接受若干處分。講出學生姓名,可能會對捐害學生私隱,但同時亦可以藉其他同學幫手,監察該學生戒毒進程。試想想,如果每間學校真係有三幾%學生食K,即係有三幾十個陪你,咁到時被驗出而姓名被公佈既話,可能已經唔係咁難堪?



當然,強制驗毒只係其中一樣,要多管齊下。除左輔導或關懷呢D老生常談,還要加強戒毒及後援,但呢D都要時間先見效。因此,打擊毒品來源,就係最快有效既首要任務。特首既然咁緊張,應該督促警方增加資源,打擊來源,甚至應該加強校內舉報機制。其實學校咁細,如果食K或賣K既話,又點可以呃晒D同學。舉報機制精神當然要以幫助同學為名,但可以考慮加入獎賞機制,鼓勵學生舉報同學校內或校外食K。

PS:最近見特首刻意在螢幕前,表示十分關注事件,並當眾督促同事,要他們加多把勁。我對此做法十分反感,好似國家領導人對一班下屬的乜乜講話一樣,都係D土法管理,並不適合本地公務員,亦不顧及本地政情。