IQ 題 – 深層意義

我諗出呢兩條問題同大家研究一，希望當大家正沉醉於短炒，過刀鋒舔血日子的時候，可以冷靜下來，做D深層次思考，為將來作長遠打算。

為集中分析回報，我要將問題簡單化，提供D資料只有回報數字，冇其他背景資料（例如地區、國家、行業、交易貨幣、基金公司、基金經理、風險、理念、組合等），而呢D都係實際投資前必讀野。其實唔理背景資料，亦反映好多人投資前D實況，只要見到隻野之前狂升，唔理佢係乜野背景，就飛身撲入。

關於公佈過去淨回報數字〈扣除收費後〉，不同公司表達手法亦見心思。簡單黎講，佢地會特別強調比較好睇D數字。例如過去第四、第五年回報不佳，就集中強調過去三年的高回報，唔提過去五年整體數字。就以四個模擬基金為例，佢地都可以用不同表達手法，放大自己比人優勝的地方。

我的第一條問題係「過去式」- past tense，原則上四間公司，都會交份年結單俾你，最後一個數字就係過去五年累積總計，多少一目了然，勝負立見。但作為基金公司，佢地有好多客戶，會係唔同時段買入賣出，有D一鋪過，有D月供，而且年期不一。為令潛在客戶容易明白過去回報情況，有時基金經理只會公佈近年每年「平均回報」，透明度高個D會講近年「每年回報」的數字。我的個案旨在說明就算四間都公佈過去平均每年10%，但在月供情況下，其累積回報可以有很大分別。所以看數字時應該留意細數，正如「魔鬼會躲在細節裏」。

第二條問題係「未來式」- future tense，根據強迫金條例，要作35年月供投資。要為將來準備，除睇過去回報外，亦一定要研究上述的背景資料。誠如投資金句：「基金可升可跌，過去表現唔代表將來，最差可以Total Loss〈呢句一般都唔講，怕嚇走你〉」。雖則如此，正如唐太宗名訓：「以古為鏡，可知興替」，過去數字肯定有參考價值，但亦勿忘「短線了了，長未必佳」，我想指出的正是前五年幫你賺最多的，不一定可以長相廝守。將來的事將來知，所以第二條問題我亦只有「建議答案」。加上35年留留長，投資環境及基金公司都不停在變，一定要定時作出檢討、調整及更換。


講咁耐，唔夠時間分析問題，答案下期提供啦