月供投資 – 免貪心，破恐懼

股神巴菲特有幾句投資格言：「恐懼和貪婪，是兩種傳染性極強感覺，並經常在投資界出現，他個人不同之處，就是“當別人貪婪時我恐懼，當別人恐懼時我貪婪“」。股神的意思好簡單，就是當股市狂升時，你要變得謹慎而唔好貪心入市；而當股市大跌之後，你反而要變得進取而勇敢入市。但世事往往知易行難，人性行為剛剛與股神所講相反，因此當股市大升時成交亦大增，股市大跌後成交就萎縮，正反映一般股民脆弱的心理狀況。

定額月供投資，包括月供基金、月供股票或甚至強積金，都能幫助股民克服上面的心理弱點。因為是每月定額付款，你於股市急升後能買到的unit會減少，即係變相減少投資，強迫自己變得恐懼（謹慎）；而當大市下跌之後，用同樣定額你能夠買到更多unit，即係令自己變得貪心（進取）。因為所有買賣都是電腦處理，到時到候就扣你筆錢，自動用當時市價買入unit，一切不經人腦，避免個人的貪心及恐懼所影響，所以月供投資做到股神的要訣。

再者，股市特色都是長遠向上，但短期會有波動，而一般波動都係：跌得快，升得慢，因此按一般統計觀察，在漫長歲月裡面（月供最少要有十年期，才將充份發揮優點），總是升的時間比較多，跌的時間比較少，因此月供計劃剛好能以統計優勢，長線捕捉大部份的股市升幅。

講咁耐，就用過去六年半MPF供款期為例，期間恒生指數升幅，再加上每年的3%派息，約等同76%累積升幅。但如果以月供MPF恒指Tracking Fund，扣除2%收費後，累積升幅都有82%，比起一鋪過買有6%額外增幅。

月供投資投資的好處，正好減低時間的風險。月有陰晴圓缺，人有三衰六旺，任何一次過的投資重鎚，話之你之前有幾詳盡分析，都有機會出錯，亦有機會撞正大市調整或股災，咁就損失巨大。月供方法能夠用時間分散風險，提高回報，減低風險，正是所有投資者追求的目標。