MPF – 識得揀，先算係老闆

呢排MPF最熱門話題，就係收費過高，波蘿以前都提過，希望盡快通過競爭，將收費減低。為証明收費高，好多報紙都會用咁既計法，話如果供足三十年，隨時有40%俾左基金公司。

呢個講法，非常片面及有D誤導，其實市面收費最高D零售基金，除左1%年費以外，另加20%表現費，舉例每年增長20%（扣除收費前），咁一年就要扣你5%費用，如果三十年月供，計埋等於俾左70% D公司。但千祈唔好俾70%嚇親，如果你搵到呢隻基金，我應該恭喜你，因為最重要就係扣除所有收費後，你每年仲有15%淨增長，能維持呢個數字三十年，隨時令你發達，如果月供二千，三十年會累積千四萬（14 million）。呢個數字唔係神話，有一隻本地港股基金，十幾年來，扣除高年費及表現費後，每年增長仍高過15%。

所以我認為研究MPF收費是否過高，客觀方法係同市面一般零售基金比較，而唔係睇三十年係少左幾多%，如果真係幫你賺到錢，俾多D收費又點話。關於點樣將MPF同其他基金比較，留番遲D講。

今次想講既係好多人希望有得揀，即係伙記唔單止可以揀基金，甚至可以揀MPF公司，令多D基金公司可以參與競爭，咁D公司自然要減低收費。咁既諗法好正路，符合自由經濟原則，但諗深一層，如果每個人都可以揀唔同公司，咁會計部每個月供款都幾頭痛，要填好多form，匯錢去唔同基金，如果人工（供款）經常變動，仲要跟唔同基金公司update D資料，另外D基金公司亦要加D人手，因為D老闆（尤其SME）可能因為週轉，容易遲遲未入數或入錯數。咁多野加起黎，增加基金選擇，最後慳到幾多收費，真係要睇市場力量。

再者，就算MPF年費收多一個%，條數長遠計好似好大，但比起揀錯基金既損失，年費算係小意思。如果你話開放多D選擇，一般市民又係唔係識得去揀。以我從匯豐MPF 01-06年數據分析，我將D數字整理，比較裏面幾隻主打類別：

類別 ********** 六年累積回報 **** 佔整體比重**
保本及保證 ***** 少於 15% ********* 25% **
均衡及增長 ******40% - 55% ******** 40% **
港股及亞洲股 *** 70% - 80% ******** 27% **

好明顯，有大約三份二人都揀左低回報果兩類，其中四份一仲揀左超低回報。數字好清楚，就算以匯豐MPF本身咁少選擇，依然大部份人揀錯，你話如果百花齊放，Ｎ咁多選擇，裏面一定有D質素差劣既籮底橙，最後揀錯會搞到臨老過唔到世。所以當大家咬牙切齒，要求減低年費既時候，唔好忘記掙大對眼，細心分析及了解自己需要，小心去揀，將來至做到老闆。