ELI - 贏粒糖，輸間廠

最近幾年，各大銀行都加個新職銜，叫客戶關係經理 (Relationship Manager)，佢地好似經常監視住你個戶口咁，一發現你戶口有D多餘錢，冇投資，冇做定期，就會Call你，介紹各類投資產品俾你。其中一味主菜，就係ELI (equity linked investment)，直譯應該叫「股票相連投資」，但銀行創作個高檔名稱，叫「結構性產品」。話時話，我都唔明點樣先算「結構性」，通常見到呢個term都唔係好野，例如「結構性失業問題」，凡係「結構性」問題，都好似巴士亞叔金句：未解決，或甚至乎冇得解決。

波蘿同老婆因為貪方便，經常到旺角利苑食飯，佢地有代客泊車，就算以旺角九反之地，隔離亦經常泊滿Benz，肯定D食客係唔野少 (小弟除外，我多數搭小巴)。酒樓遵從中國人「地盡其用」節儉美德，坐位編排得密質質，大大縮短人與人之間距離，亦令我經常聽到其他食客高談闊論。

今次波蘿唔覺意又聽到隔離食客大聲傾計，佢地應該係兩對夫婦，兩個男的好似分別叫Paul 哥及Tommy，今次應該係Paul 哥請食飯。酒過三巡，四條友至少殺死一條鯊魚、兩隻龍蝦及四個鮑魚，正係享受緊個官燕，Paul 哥面紅紅上頭，要發表一下：

Paul: Tommy, 最近忙D乜

Tommy: 冇乜野特別忙，你知啦，我地做工程，個市鬼咁淡，都唔夠job俾D伙記做，年中如果仲唔夠數，可能又要．．，唉！ Paul 哥你又點呀，你地做Fund 佬，呢排個市又係咁升，應該好掂啦。

Paul: OK 啦，我個Fund唔係最搏個D，總之人升我又升啦，緊貼大市，唔好跑輸，最緊要交到數，尤其就快六月底半年結，盤數一定要攪到好好睇睇。

Tommy: 咁最近你地投資邊方面最賺錢呀？

Paul: 梗係大陸股市啦，全球焦點所在，走唔甩。咁你又有乜野投資呀？

Tommy: 個股市升咁多，我唔敢再差隻腳落去，主要係聽銀行Sales建議，買下ELI，叫做風險低，好過做定期。

Paul: 乜話 ELI，專搵人老襯個D呀？

Tommy: 唔係喎，都好OK，我玩兩年，拉勻黎計，每年都有成12% return，對我地D唔係食開大茶飯人黎講，好OK架喇

但見Paul哥成碗杏汁官燕急急腳倒落喉嚨，都未吞晒就拍一聲放低個碗，趕住開口講野。

Paul: DLS ！(助語詞，取材自「渣沽手冊」)，12% annual return，你好彩，你知唔知如果隻股票跌又點呀？

Tommy: 唔係喎，一開波就先執1%折扣，以一個月為期，一年計等於12% annual return，就算隻股跌低過某價位，都已經袋1%先，圍起黎一年就有12%，銀行仲話．．．

Paul: 唔駛講喇！(顯得好晤耐煩)，呢加野我都唔知幾熟。ELI係近年銀行專Sell 俾有閒錢個D客，尤其private banking客戶，好多係做幾十年小生意，積落D錢，唔甘心定期低息，又唔敢放晒落股票，銀行就介紹ELI俾佢地。另外就係Sell俾D乜鬼尊貴客戶，我見過你張銀行咭，好似你都係呢類，咁D銀碼當然細過Private Banking，但對銀行黎講一樣係冇風險，賺硬。

Tommy: 有賺硬投資咩 ？

Paul: (Paul 哥拎起杯紅酒，慢慢，好整以暇，清清喉嚨，再加上專家口吻) Sure，銀行黎講就賺硬，差在多少。ELI呢家野通常係有基金或者大莊家，重貨，見個市係咁升，但又驚隨時調整，就出ELI，經Retail Bank賣俾D散客，Retail Bank賺硬手續費及Commission，話知隻股點舞，都唔關佢事，總之Zero Risk。至於個莊家出完ELI，就等於鎖定利潤，以1-2%使費，將股票下調風險轉嫁俾你，如果個市繼續升佢就繼續賺，亞四叔D壽仔賺極都唔放，就係因為賣ELI，等於買保險，唔怕市跌，萬一真係跌就搵你用高價接晒D蝕本貨。

Tommy: 但係呢兩年個市都試過調整，但我最後都唔駛接貨喎。

Paul: 咁係因為每次調整都好短時間，唔夠一個月又反彈番上去，最後都升過接貨價。實情如果你對隻股票有信心，不如買實股，話晒贏就贏盡。你買ELI就等於Short個Put Option，莊家Set得個價買你個Option，一定計晒引伸波幅，流通量，佢地又可以沽低個價，迫你接貨；加上仲要俾埋銀行銷售費及Commission，你點玩 ？

Tommy: 呀？

Paul: (收唔到口，紅酒溝口水) 呀乜，Short Option 喎，你D Engin佬梗唔識係乜，就係: 回報有限，風險無限；即係 贏粒糖，輸間廠 ；唔係你玩。

Tommy: Short乜鬼Option，唔知你講乜，俾你攪到Short就真，我都係番去再諗清楚。不過都好多謝你D意見，尤其多謝呢餐！