10年生意兩茫茫

回歸十年，潮流興講回憶，我都唔執輸，review一下，睇下過去十年，市場競爭點樣激烈法。唔經唔覺，我離開打工行列都超過十年，我地從事TMT行業承建商，因為多數對住D客都係大公司，乜鬼生意都要去投標，而且因為全球一體化，除左要同本地公司爭，仲要同海外公司爭。

但同一大小及複雜的job，過去十年D價錢就差好遠，好似十年前一個用10 mil到既job，今日如果你bid超過3.5mil都唔駛諗有機。咁究竟點解平左咁多，邊度慳左錢，可以平咁多。理論上要平左65%，應該每一個價錢結構成份，都平左65%，我試下分析D價錢結構，睇下做唔做到：

1. 材料： 科技材料費有D平左好多，都有一半（50%），亦有D冇乜點平，尤其果D同原材料有有關既，因為金屬及石油副產品近年好貴，計晒所有，可能都平唔到30%

2. 伙記人工： 都叫做專業，唔單止冇減過，醒果D仲double左，工時亦冇乜長到

3. 地盤工人： 話晒都係科技行業，工人都算係skilled labour，人工都冇乜點減，但工時就長左，effectively等於慳左20%啦

4. 利潤： GM由過去20%變成approach to but not less than 0% （有時Hi 野都變左negative）

如果你中學會考數學合格，你應該即刻睇到D數唔match，四樣野加起來，好似大纜都扯唔到去60%，D錢去左邊度， Where's is the beef ？

答案：經驗 and 創意

事實最後慳錢方法，就係靠「經驗及創意」，做到 Do more with Less。用聰明設計方案，以更少同更慳皮材料，難聽D講就係偷工減料，但唔影響製成品質素〈完全唔影響就假，總之核心質量及功能冇變啦〉，最後交到貨俾個客，而佢又滿意。

至於點樣work smarter ，我都唔知點講，大概一切從「心」出發，做野〈唔係講野〉要有heart，呢個講法雖然係糠D，亦係引爆你既小宇宙最有效方法。

借蘇東坡首詞，稍為改動下，互勉互勉：
「十年生意兩茫茫，不思量，自難存；千里戰場，輸左就淒涼。」

之後十年又點？　就好似我Blog頭講：有D迷惘。