上癮

開始學人寫幾個禮拜Blog，我已經發現自己上癮。唔知點解，每次對住keyboard，就算簡單話題，都好似寫極寫唔完咁。記得以前會考中文作文，我最多都係寫八百字，但而家就閒閒地寫過千字，都唔係好想收手。加上我已經超過二十年未寫過中文，就算思潮如泉湧，仍覺手執千斤擔，同埋我用中文輸入法，係江湖上恐怕已經失傳「縱橫」，我估D威力頂多快過「速成」少少。

加上除寫野，我亦上癮經常去其他Blog觀摩，到處留情又留言，都流連唔少光陰。最近仲裝埋Histats，睇有冇人光顧自己個Blog。果種感覺就好似有個老闆仔，剛剛開間one-man鋪頭仔，成日希望多D客黎光顧，就算唔買野，入黎行睇，多D人氣，都係開心。但係個老闆仔又好怕醜，唔敢招呼人，只好靠鋪頭個反射鏡（Histats），曲線睇D客人數目，光顧時間，同埋少少背景資料，搞到成日都好似做緊偷窺漢咁。

以上等等，已佔據我唔少時間同埋心力，工作時間少，最慘連消閑時間都晤見埋，正如有兩期週放係面，好似到宜家我都未揭過。

呢鋪癮，會唔會越黎越深，從此 "mit" 唔甩 ？

還望各位前輩點化 ！