的士「連長」

波蘿因為過去陰影，加上香港搵位泊車困難，一直都冇係香港車。再加上我比較心急，的士變成我既主要交通工具。除平時早出門口，返工搭地鐵外，一般放工、出街或返亞媽度食飯，都係打的，因為中長途車程關係，一個月大大話話都貢獻幾千蚊私己。不過我唔喜歡叫七折的士，主觀上覺得唔係咁正路，對其他打單泡司機唔公平。另外就係我好怕上架七折「指揮車」，除會完全喪失寧靜空間，生命安全亦受到威脅。記憶中我只係幾年前試過一次，由沙田到灣仔公司，正價連隧道費成百七蚊，我想試下係咪真係有價講，我當場「威脅」司機收八折，司機當然「無奈」答應。

所以我一直用隨機（隨緣）截的士方法，邊個咁就揀邊個。以過去幾年市道，加上我「識訂」，通常唔駛兩分鐘就有車上，比起叫七折的但係要隨時等五至十分鐘，前者既瀟灑感覺就係我願意付出既「溢價」。但有時唔好彩，一樣會截到指揮車，今日放工就上架咁既車。我一睇車頭位置，除一般指揮車裝備，即係棟起四部手提電話，隔離有兩部Walkie以外，仲加多個PDA，從倒後鏡望一望司機，四十幾歲，個樣幾醒目，戴住個有閃燈既藍牙，成個G4咁既款。

我一坐低講完目的地，就見佢電話響個不停，司機個大腦、小腦、手腳、眼耳及嘴巴同時發揮多種功能，不斷接駁各類order，做到冇停手亦冇停口，過大約十分鐘先見佢做完D order，可以靜一靜，

司機對我講：「唔好意思，嘈住你，不過搵食艱難呀。」

我見佢個樣咁誠懇，都好好奇問佢個PDA要黎做乜。司機即刻示範一手呔，一手Scroll Down D客戶資料俾我睇，包括電話、住戶及公司地址，動作一氣呵成，好Pro。我又再問佢個Team有幾多人，原來有成二百部車，好似佢咁D指揮車有十部左右，盡量分散市區各處，就好似隊波有十個球員咁，各施各位，拉開黎踢，加強同其他隊友D接駁功能。

我問佢好似今次咁，接我由九龍東去九龍西，會唔會將佢隊波拉散。佢話唔會既，大家D隊友會有默契，好似荷蘭隊咁，識得自動走位喎。我笑佢地好似成隊兵打緊仗咁，佢負責廿個兄弟，計下人數都算係「連長」級，是否多一份人工，好好搵呢。

司機笑笑口話：「OK 啦，OK 啦。。」

跟住佢電話又響，身體各部份又開始工作。

。。。

終於返到屋企門口，「連長」俾張咭片我，叫我多多關照。我笑笑口婉拒，只係話一切隨緣，希望下次有機會再坐「連長」你架車。

我踏出車門，深深吸一口新鮮而寧靜的空氣，不期然從心裏講出來：

「感謝主，終於又安全到步！」