巴菲特 – 愛的回報

好多智慧型的投資者，都會將股神巴菲特作為偶像，並且經常閱讀股神大作，對股神金句更加琅琅上口，其中最為膾炙人口幾句包括：

1．投資三大教條： 第一，儘量避免風險，保住本金；第二，儘量避免風險，保住本金；第三，堅決牢記第一、第二條。

2．要在別人貪婪時恐懼，在別人恐懼時貪婪。

3．只有在潮水退去的時候，你才知道誰一直沒有穿泳褲


好多名言是係知易行難，主要係內心總有貪念及恐懼，加上難以克服的心魔，無辦法做到股神所言。而且好多決定除左心理質素以外，timing亦最重要，而timing之準確與否，取決於資料掌握及分析，但更重要的恐怕仍然係「運氣」。就算你完全擁有股神的特質，但如果欠缺運氣，一樣難以大成。所以我經常講，巴菲特能夠成為股神，除左佢既IQ同EQ之外，運氣亦功不可沒；假設巴菲特返到二十歲，有同樣智慧重頭開始，我就唔信佢最後能累積千億財富。當然。以佢IQ及EQ，要累積幾千萬或甚至幾億財富就應該問題不大。

最近巴菲特及蓋茨同時接受訪問，股神被問及自己最大成就，佢既回覆：

「我最大成就係：我愛的人，同樣愛我」，

一個非常簡單的答案，但係就發人心醒。原來股神最自豪唔係千億身家，亦唔係每年二十巴仙回報，亦唔係世人既崇拜，而係好humble咁享受愛人同被愛既感覺。

當我地埋頭埋腦去爭取多一點金錢回報既時候，又有冇忽略身邊既人，小左關顧佢地，而同樣地佢地又有冇小左care你呢。有時唔駛等到發達先去關顧身邊人，只怕到時你已錯失好多機會，而有D機會走左係錢買唔番。我好多時見同輩朋友，放左好多時間同心力係工作上面，希望做到最好，繼續升職加薪，但就往往忽略左身邊人。好多時候，賺多左D錢買唔到你需要既愛，但因為顧住賺錢而損失D愛，就有錢都買唔番。寫到咁鬼感性，皆因近年幾位同齡朋友都相繼蒙主寵召，自己更加覺得親情及友情可貴，希望藉此自勉。

巴菲特咁中意投資，唔知佢有冇將愛睇成一種投資。我意思就係你要付出愛作為本金，然後用盡方法，去爭取最大的愛作為回報。只求愛人（本金），不求被愛（回報），恐怕只有聖人先做到。